Helu 3

I ke kaʻakaʻa hou ʻana o ko Laʻialoha mau maka, ua hewa nō i ka nani o Manawainui. Me he mea, ua akāka aʻe kona ʻike, a mea ʻē ka ikaika o ka uliuli o ka nahele, ke ʻala huʻihuʻi nō hoʻi o ka ʻawapuhi me nā lipo ʻē aʻe o ka wao. E kū ana nō ʻo ia ma kaʻe kiʻowai, e pōhai ʻia ana e ka ʻōhiʻa me ka ʻōlapa, lupea nō i ke oho o ka palai a me ka lauaʻe. Hiolo mai ana ka wai huʻihuʻi o ka wailele i luna o nā pōhaku a lele aʻela nā hunahuna wai i luna e hōʻolu ana i ke ea o ia kīpuka uluwehi. A ʻo ka wai maʻemaʻe o kona hoʻoheno mau ʻana, he aliali mai hoʻi kau a koe.

E kono piha mai ana ia wai iā ia e luʻu iho, i ʻolu mai ke kino wela. Wehe aʻela ʻo ia i ka lole a pau a hoʻolei akula i luna o kekahi pōhaku maloʻo ma ka ʻaoʻao. ʻOiai he hoʻokahi hola ka lōʻihi o ka piʻi kuahiwi ʻana e hiki aku ai, kuhi akula ʻo ia ʻaʻohe kanaka e hiki mai ana.

Hele akula ʻo ia i loko o ka wai huʻihuʻi a ʻiniki maila nō ia i ka wāwae a me ka ʻūhā. Hoʻomau akula a hāʻaleʻale mai ana nō i ke alo o ka iʻa. Liʻuliʻu akula nō i laila e haʻulili ana i ka ʻolu a me ka ʻono, a laila luʻu akula ʻo Laʻialoha i lalo o ka wai. I loa nō a komo ʻokoʻa kona kino, māmā aʻela ka naʻau a pau ihola ka piolo o ka noʻonoʻo. Aea aʻela a lana ma kona kua me ka nānā aʻe i luna i ke aouli me nā pali hāuliuli o ke awāwa.

ʻAuʻau akula ʻo ia a mani pono ihola ka wela o kona kino. Iā ia e hoʻi ana i kaʻe kiʻowai, makahani maila kahi ʻoʻopu i kona wāwae a hene aʻela ko Laʻialoha ʻaka i ka paheʻe walewale o kona ʻili. He mea kupanaha iā ia ke ola ohaoha o ia wahi. Hōʻaʻapu akula ʻo ia i kona mau lima, hoʻopihapiha maila i ka wai, hāpai aʻela, a inu ihola. He ʻono nō a haʻalele wale ka wai ola o Manawainui.

ʻIke akula kona mau maka i kahi pōhaku pālahalaha i lawa kona nui e moe pono ai kona kino holoʻokoʻa ma luna. Hele akula ʻo ia a pinana aʻela ma luna. ʻO ka lalala ihola nō ia me kona alo e huli ana i luna, i ka lani ʻalaneo. He kōnale maoli nō ka i kau mai ma luna ona.

Ua hala kekahi mau minuke a huli akula kona alo i lalo. ʻAʻole i liʻuliʻu, komo pono maila ka wela o ka pōhaku i loko o ko Laʻialoha kino. Holo akula ka hahana a i kona piko waiʻolu a pīhole iki ʻo ia i ka ʻoni mālie ʻana o lalo.

Haʻohaʻo wale kona manaʻo a hoʻāʻo ihola ʻo ia e kāomi i ka mea a kona kino e ʻike nei. Kia akula kona noʻonoʻo i ke kani alawī o ka ʻamakihi e lele aʻe ana i waena o nā lālā o ka ʻōhiʻa. Aheahe maila ka makani, hoʻokapalili akula i ka lau o ka ʻōlapa, a hoʻomanene maila nō hoʻi i kona kino.

Kauō ikaika ʻia ihola kona manaʻo i ka ʻoni mālie i lilo aʻela he konikoni. Kokōhi ana ʻo ia i ia ʻano, akā ua makehewa. E mōhala pono mai ana ka ʻōhāwainui o ke kuahiwi, ka pua lahaʻole hoʻi i nele i ka muki ʻole mai o ka nuku manu.

Aia hoʻi, lohe aʻela ʻo Laʻialoha i i ke kuhō o ka wai. Hoʻokahi wale nō kani o ia ʻano, ʻo ke kanaka hoʻi i ka luʻu aku. ʻAʻole i ʻū, ʻo ka paʻina nō ia o nā wāwae pulu e hele aʻe ana ma ka pōhaku maloʻo, a laila hikilele aʻela ʻo Laʻialoha i nā kulu wai huʻihuʻi e heleleʻi ana i luna o kona kino. ʻO ka ʻōhelohelo o ka ʻūpoʻi maka, ua lilo he poniponi a kuhi ihola ʻo ia e kū ana ke kanaka ma kahi kūpono e malu ai ʻo kona helehelena.

I ʻalawa aʻe ka hana i luna, e haka pono mai ana nā maka onaona loa o kahi ʻiliʻula lawakua iā ia. Nupanupa nō hoʻi ka ulu ʻana o kona lauoho ʻeleʻele piʻipiʻi lau nui a hala ka poʻohiwi. ʻŌlali wale maila kona ʻili pulu.

Hoene koke maila ko ia ala leo nahenahe i nā pahu kani o Laʻialoha nei, i ka ʻī ʻana mai, “Aloha kāua. Maikaʻi kuʻu pōhaku, ʻeā? E hoʻomaha iki ʻoe, ʻaʻole pilikia.” Me ia nō i noho iho ai ke kanaka, i mea e hōʻoluʻolu ai. ʻImi hou akula ʻo ia e hoʻomalu aku i ko ia nei maka i ʻole ai e ʻeha i ka mālamalama mai o ka lā.

Kani aʻela ko ia nei ʻaka a pane akula, “Nou hoʻi hā nei pōhaku?” He pāʻani naʻe ke ʻano o ko ia nei leo, e like hoʻi me ko ia ala.

“ʻAe, noʻu nō. Makepono nō naʻe ka uku o ka moe ʻana ma luna,” i hoʻokaʻau wale mai ai ka uʻi me ka ʻālohilohi wale ʻana mai nō o kona mau maka i ka hialaʻai.

ʻO ka mea kupanaha loa, ʻaʻohe wahi makaʻu o Laʻialoha, a ʻaʻohe nō hoʻi ona lihi hilahila. ʻO ka puana maoli hoʻi a kona naʻau, ua malu ʻiʻo nō.

ʻAlawa hou aʻela ʻo Laʻialoha i nā maka o ka uʻi lā me ka ʻī aku, “Kāhāhā! He uku! A he aha lā hoʻi ia?”

“ʻO ka ʻike aku nō i ka wai Koʻolihilihi.” I nūnū mai ai ka uʻi me ka haka pono wale mai i loko o ko ia nei mau maka.

I ia wā nō, hālāwai pono akula ko lāua mau maka, e hōʻoia ana ua kū nō lāua i ka honua o ka makemake kaulike. Kīkoʻo maila ko ia ala lima a hahani maila i ko ia nei papālina. ʻO ka lalapa nō ia o ka pīhoihoi i loko o ia nei, me ka ʻōkalakala o ka ʻili mai ke poʻo a ka hiʻu.

E nā makamaka heluhelu e kaunu pū nei i kēia moʻolelo, ma ʻaneʻi nō e huki aʻe ai ka luna hoʻoponopoo i ke kapa hīnano i luna, ka pākū ʻaʻala e malu ai nā ipo ahi. E waiho ʻia aku ka ʻōlelo no ka ʻūlei hoʻowali ʻuala a me ka lepo ʻaeʻae o ka uka o Haleakalā. Maliʻa e haʻi ʻia aku ka moʻolelo piha i kahi wā aku. E ʻike naʻe ʻoukou, ʻo ka uku a ka uʻi i kau ai ma luna o kona pōhaku, ua uku pono ʻia aku nō i ka ka huahuaʻi ʻana mai o ka wai welawela a nui wale, ʻaʻole o kana mai.

ʻO ka maka mua nō kēia i wela ai ka nuku o Laʻialoha nei i ke āhole, i lihaliha pono ai hoʻi ʻo ia i ka piko o ke akule. He ʻono mai nō hoʻi kau a koe, a he ʻoi loa aʻe i kā nā ʻoʻopu peke ʻelua āna i ʻike ai ma mua. Iā ia i ka niʻo o ka mahalo me ka laʻi o ke aloha, uhi maila ke kapa ʻeleʻele, a me he lā e lana aʻe ana nō kona kino i luna. Pau ka ʻike, pau ka lohe, a miha lanaau hou nō i ka pō.

I ko Laʻialoha komo hou ‘ana iho i loko o ka lua ‘uhane, me he mea lā e pōlulumi ʻia ana, e miki iho ana hoʻi a ʻiʻika loa. Manaʻo ihola ʻo ia i ka ʻōhua e puka ana ma ka nae, ka lopi gula hoʻi e komo ana i ka maka o ke kui keleawe, ka ua mea ʻo ka ʻololī. Mahuʻi koke aʻela ʻo ia i ka ʻeha kūkonukonu, ʻaʻole naʻe hoʻi pēlā. ʻO ka mea wale nō i ʻike ʻia, ʻo ka pili pū o ka hanu i loko o ka umauma, me ka mau o ka pō o nā maka. Iā ia e paheʻe iho ana i loko o ia pōʻeleʻele ikiiki, hoʻāʻo ihola ʻo ia e huki i ke aho, ʻaʻole hiki.

I loa nō a komo hou ka hanu i loko o ke akemakani, ala aʻela ʻo ia me ka hikilele a noho ana i luna o ka pela moe. Kāʻiliʻili ka hanu a kaʻakaʻa wale aʻela kona mau maka, ua ʻeha nō naʻe i ka mālalalama nui ʻana mai o ka lā e pohā kea mai ana, mai loko mai o ka puka aniani o kona lumi moe. Ua maʻū ʻokoʻa nā uhi pela, a e kulu ana ka hou ma kona lae. Moe hou ihola ʻo ia a kau ke keha i ka uluna. Ua paupauaho a pōniuniu iki.

He mea kū i ke kāhāhā ka ikaika o ka moeʻuhane. Ua lohe mua ʻo Laʻialoha no ke kāne o ka pō a me ke kahaʻula, ʻaʻohe naʻe ona ʻike maoli i ia mau mea. E kiʻelei ana kona naʻau i waena o ka hialaʻai me ka ʻōkū. ʻO ka hoʻoipoipo ʻana me ke kamaʻāina ʻole, ʻaʻohe wahi kohu o ia hana i kona manaʻo, a he kūʻē i kona ʻano me kona mau manaʻo no ka pili ʻana me ka ipo. ʻOluʻolu nō naʻe ia kanaka, maluhia ia manawa, a ua kena lipo kona makewai. Hauhili wale maila nō kona noʻonoʻo.

I kona mau manaʻo nō e ʻāʻumeʻume ana i loko ona, kani aʻela ke kelepona. ʻO Keakalani ia e kelekiko hou mai ana. ʻAʻole naʻe i heluhelu ʻo Laʻialoha, ʻoiai ʻike akula kona maka ua kani ka hola 9:45. Piʻoloke aʻela kona naʻau i ka lohi maoli. ʻAkahi hoʻi! Paio akula ʻo ia i ka māluhiluhi ikaika a hele akula i ka ʻauʻau.

I loko o 10 minuke e holo ana kona kalaka ma ke alanui. I ke kāʻalo ʻana aʻe iā Ching’s Store, hoʻomanaʻo aʻela ʻo ia i ka poho pōhaku. Ua poina wale iā ia ka lawe ʻana. Aia lā ke waiho ala i luna o ka pahu ʻume.

ʻAʻole i pau...