Kaulana Ke Aloha ʻĀina

Kaulana Ke Aloha ʻĀina!!!

He uila e ʻānapa ana,
Pēlā kuʻu Aloha ʻĀina,
Ma nā welelau o ka honua,
Ua puni i ka lono no Hawaiʻi.

Ma ka ʻauinalā o ka Pōʻahā nei, ua hoʻi mai kekahi mau Lede o ke Komite o ka Hui Aloha ʻĀina o nā Wāhine mai ka noho mai o ko lākou Hope Peresidena Mrs. J.A. Cummins ma Pāwaʻa, a iā lākou e hoʻi mai ana a kokoke i ka huina o ke alanui e piʻi ai i Mānoa, kāʻalo mai ana he mau kaʻapio me nā piha ʻōhua haole mailihini mākaʻikaʻi no ka hikina mai, ma luna mai o ka mokuahi Belegica. 

Nīnau aʻela nā malihini i ka hoʻokele kaʻa, “E ia nei, he aha kēia poʻe Lede e hele aʻe nei?” Pane ka hoʻokele kaʻa.

“ʻO nā Lede kēia o ka Hui Aloha Aina o nā Wāhine.”

I ka wā a nā malihini i lohe ai i kēia mau huaʻōlelo “Nā Lede o ka  Hui Aloha Aina” ua lele koke ihola lāua i lalo, a wehe aʻela i ko lāua mau pāpale, a hoʻolauna ponoʻī maila iā lāua iho me ko lāua aloha ʻana mai i nā Lede Hawaiʻi.

Huli aʻela lāua a kāhea akula ko lāua mau hoahele e kau ana i luna o ka lua o ke kaʻa, e lele mai i lalo. Lele koke maila nō hoʻi lāua a wehe aʻela i ko lāua mau pāpale a aloha maila i nā Lede Hawaiʻi, a aloha aku nā Lede i lākou me nā hiʻona o ke pāhaʻohaʻo no kēia launa malihini ʻana. ʻO nā kūkaʻi ʻōlelo ʻana ia wā, ʻo ia nō kēia:

“Ua lohe mākou a ua ʻike ma nā nūpepa ma ko mākou ʻāina no kā ʻoukou mau hana, nā Wahine Hawaiʻi, no ka hoʻoikaika e hoʻomau ʻia ke Kūʻokoʻa o ko ʻoukou ʻāina, a me ke noi e hoʻihoʻi hou aʻe i ko ʻoukou Mōʻī wahine ma ka Noho Aliʻi o Hawaiʻi. ʻO kēia manaʻo o ʻoukou i hana ai, no ko ʻoukou ʻāina, he mea ia na mākou a me ko mākou ʻāina ʻo ʻAmerika i mahalo nui ai. E nā Lede, ʻo ka hapanui loa o nā poʻe ʻAmerika, ʻaʻole nō lākou i mahalo i nā hana ma luna o ʻoukou me ka pupuāhulu lokoʻino maoli. Ua minamina mākou i ka loaʻa ʻole he wā e kipa aku ai e ʻike i ko ʻoukou Mōʻī wahine, ʻoiai ua pōkole loa ko mākou manawa ma ʻaneʻi.”

Ua panaʻi aku nā Lede Hawaiʻi me nā hopuna ʻōlelo māmā palanehe i nā Keonimana malihini a pāhola like aʻela i ke aloha good bye! A māwehe aʻela ka hoʻolauna ʻana o ke alahele. Haʻalele i Puna nā hoaloha ē!

Na ke aloha i hānai mai,
I kuʻu lā pōloli hoʻi,
Na ka haliʻa lā i hoʻoinu mai,
I ka manawa ʻono wai hoʻi.

Ua puni ke ao holoʻokoʻa i ke kaulana o ko ʻoukou Aloha ʻĀina, e nā Lede o Hawaiʻi Nui a Keawe.

Na ka mea hoʻoponopono i hoʻokomo i ka ʻokina a me ke kahakō ma kēia mana o ka moʻolelo. Inā hoihoi ka manaʻo i ka heluhelu ʻana i ka mea kumu, e pihi wale iho ma ʻaneʻi.